Blog
O Mercado Medieval de Corcubión planta cara á choiva e énchese de animación
Tal como ocorrese na xornada inaugural do venres, a choiva volveu facer acto de presenza onte no Mercado Medieval de Corcubión e alterou lixeiramente o horario de apertura da xornada matinal, pero unha vez que escampó, as rúas fóronse enchendo de animación.
Así o confirmaba pouco despois da apertura vespertina, pasadas as seis da tarde, Saray González desde os dous postos de venda de artesanía en coiro e xabóns que rexenta xunto á súa parella. Chegada desde Madrid a Corcubión animada polas recomendacións doutros moitos comerciantes, esta debutante no Mercado corcubionés sinalaba que a esas horas eran máis os que paseaban que os que se paraban a mirar e comprar, aínda que recoñecía que se vía bastante animación nas rúas.
A exhibición de cetrería, o humor de Bandora, as coplas e os contos e as actuacións musicais na rúa foron facendo tamén acto de presenza pola zona vella da localidade a medida que pasaban as horas.
"Gústame bastante porque a xente se involucra moito, vístense como nós e contribúen tamén á animación, é algo de agradecer", apuntou desde o posto de algodón de azucre Beatriz Climent, chegada tamén desde Madrid, pero que suma xa dúas participacións neste Mercado.
A pesar da choiva, Climent aseguraba que o ambiente está a ser similar ao do ano pasado e confiaba en que o tempo fose benévolo durante a xornada de hoxe para poder pechar a súa participación cun bo sabor de boca, e non só polas súas golosos produtos.
Fonte: La Voz de Galicia
Entrada publicada: 20/07/2014
Volver
